„ფარდულის დემონტაჟის გადაწყვეტილება ადგილობრივმა მოსახლეობამ გამოძიებისგან დამოუკიდებლად მიიღო“, - ამის შესახებ შინაგან საქმეთა სამინისტროს წარმომადგენელმა კახა სირაძემ ხორავას ქუჩაზე მომხდარი მკვლელობის ფაქტის შემსწავლელი დროებითი საგამოძიებო კომისიის სხდომაზე განაცხადა.

საგამოძიებო კომისიის წევრი ოთარ კახიძე დაინტერესდა ფაქტით, თუ რატომ მოხდა ფარდულის დემონტაჟი, სადაც სასიკვდილო ჭრილობები მიიღო დავით სარალიძემ და რატომ არ დაილუქა ის.

შსს-ს წარმომადგენლის კახა სირაძის განმარტებით, შემთხვევის ადგილის დათვალიერება და დასურათება სრულად მოხდა და შესაბამისად, ფარდულის დემონტაჟი მხოლოდ მას შემდეგ მოხდა, რაც რამდენიმე საგამოძიებო ექსპერიმენტი ჩატარდა.

„მოგეხსენებათ, რომ შემთხვევის ადგილი დაცულია იქამდე, ვიდრე შემთხვევის ადგილი თვალიერდება. დამთავრდა შემთხვევის ადგილის დათვალიერება, ამოღებულ იქნა ყველა შესაძლო კვალი, საგანი. გადაღებულ იქნა 400-მდე ფოტო. ამასთან, დემონტაჟი მოხდა მას შემდეგ, რაც რამდენიმე საგამოძიებო ექსპერიმენტი ჩატარდა.

ფარდულის დემონტაჟის გადაწყვეტილება მიღეს ადგილობრივმა მცხოვრებლებმა, ჩვენგან დამოუკიდებლად. საქმის კურსში არ ჩავუყენებივართ.

ეზო მოიცავს ფარდულსაც და შემთხვევის ადგილი იყო მთლიანად ეზო. საყოველთაო სარგებლობის ფართიცაა. ეს წარმოადგენდა მაწანწალა ძაღლების თავშესაფარს და მოსახლეობაც წუხდებოდა.

რაც შეეხება მის პარამეტრებს, ამ ტერიტორიას გააჩნია კონტურები, რადგან ის მიწაშია შეჭრილი და მისი აღდგენა არ გაჭირდება“, - განაცხადა კახა სირაძემ.

წყარო :