„გირჩის“ ერთ-ერთი ლიდერი – ზურაბ ჯაფარიძე სახელს იცვლის და ზურაბ “გირჩი” ჯაფარიძე ხდება. ამ მოთხოვნით, ზურაბ ჯაფარიძემ იუსტიციის სამინისტროს ოფიციალურად მიმართა.

თავად ზურაბ ჯაფარიძე სახელის შეცვლასთან დაკავშირებით, პრობლემას ვერ ხედავს. როგორც ზურაბ ჯაფარიძე სოციალურ ქსელში წერს, მისი სახელის შეცვლის მიზეზი მოახლოებული საპრეზიდენტო არჩევნებია.

მისივე თქმით, იგი ცესკომ საპრეზიდენტო კანდიდატად „გირჩის“ სახელით არ დაარეგისტრირა.

„ცესკომ” დაგვიდასტურა, რომ საპრეზიდენტო არჩევნებში ოფიციალურად ვერ ვიქნები “გირჩი” / Girchi-ს კანდიდატი პარტიამ რომ კანდიდატი დააყენოს, წინა არჩევნებზე უნდა იყოს რეგისტრირებულიო და ამ წესს ცესკო ვერ ცვლის, პარლამენტის შესაცვლელიაო.
ჩემთვის და “გირჩელებისთვის” პრინციპული საკითხია, რომ ბიულეტენში ეწეროს “გირჩი”.

საბოლოო ჯამში, ჩემთვის ხმის მიცემა “გირჩისთვის” ხმის მიცემაა, რადგან ცალკე აღებული, ჯაფარიძე არ უდრის “გირჩს”.

ცალ-ცალკე “გირჩამდეც” გვიკეთებია რაღაცები, მაგრამ ის, რაც არის “გირჩი”, მხოლოდ ჩვენი ერთობლიობით შეიქმნა.

რადგან ქართული საარჩევნო კანონმდებლობა საკუთარ თავზე აქვთ მორგებული მსხვილ პარტიებს და, როგორც მსხვილი ბიზნესები, ხელს უშლიან პატარა მოთამაშეების პოლიტიკურ ბაზარზე შესვლას (რისი გამოხატულებაცაა ეს კონკრეტული შემთხვევაც), გადავწყვიტეთ შემდეგი (იდეის ავტორი Dato Rogava):

ხვალ ოფიციალურად მივმართავ იუსტიციის სამინისტროს, რომ ჩემს სახელს დაემატოს ე.წ middle name – “გირჩი”. ანუ, რომ გავხდე – ზურაბ “გირჩი” ჯაფარიძე.

ამ გზით, “გირჩი” მოხვდება საარჩევნო ბიულეტენში.

აქვე მინდა მივმართო საქართველოს იუსტიციის სამინისტროს:

ვიცი, რომ ასეთი ცვლილებების რეგისტრაციისთვის 60 დღე გაქვთ, თუმცა, ჩემ შემთხვევაში, მგონი ყველასთვის ნათელია, რომ ამ ცვლილებას არ ვითხოვ საკუთარი რეალური იდენტობის დამალვის და წარსული ცოდვების მიჩქმალვის მიზნით. შესაბამისად, იქნებ სწრაფად განახორციელოთ ამ საქმის ადმინისტრაციული წარმოება, რათა 1 სექტემბრიდან მომეცეს კანონმდებლობით გათვალისწინებული სხვა პროცედურების ვადებში განხორციელებისა და კამპანიის სრულფასოვნად წარმართვის შესაძლებლობა.

პ.ს. ასევე, ვიცი, რომ სახელის შეცვლა მხოლოდ ერთხელ არის კანონმდებლობით ნებადართული და შესაბამისად, “გირჩი” სიკვდილამდე დარჩება ჩემს middle name-ად. ამაში პრობლემას ვერ ვხედავ“, – წერს ზურაბ ჯაფარიძე.

წყარო :