ოდესის ოლქის გუბერნატორის მოადგილის მოვალეობის შემსრულებელ მარია გაიდარის პრესმდივანმა ვიქტორია სიბირმა სააგენტო „უნიანს" განუცხადა, რომ მარია გაიდარმა თანამდებობა დატოვა.

მისი განცხადებით, თანამდებობის დატოვების მიზეზი 1 მაისიდან სახელმწიფო სამსახურის შესახებ ახალი კანონის ამოქმედება გახდა.

„დღევანდელი დღიდან მარია გაიდარი ოდესის საოლქო ადმინისტრაციის ხელმძღვანელის შტატგარეშე მრჩეველია და მისი მოადგილის მოვალეობებს აღარ ასრულებს", - განაცხადა ვიქტორია სიბირმა.

დღეს ოდესის საოლქო ადმინისტრაციის შენობასთან რამდენიმე ათეულმა ადამიანმა მარია გაიდარის გადადგომის მოთხოვნით აქცია გამართა.