რუსთაველის გამზირზე ისევ პროტესტია. „მშრალი შიმშილობა გაგრძელდება მანამ, ვიდრე მკვლელების დამცველ ხელისუფლებას სახლში არ გავუშვებ,“ - აცხადებს ზაზა სარალიძე და ცალკეულ მაღალჩინოსნებს საქმის გაყალბებასა და დამნაშავეების მფარველობაში ადანაშაულებს, მიუხედავად იმისა, რომ ხორავას ქუჩის საქმეზე 10 ადამიანია პასუხისგებაში მიცემული, თანამდებობა დატოვა მთავარმა პროკურორმა ირაკლი შოთაძემ და შინაგან საქმეთა სამინისტრომ ხელახალი გამოძიება დაიწყო. პროტესტიდან პროტესტამდე იყო მოლოდინის სამი თვე - რას იტყოდა პარლამენტის დროებითი საგამოძიებო კომისია. დასკვნა და რეკომენდაციები უკვე გასაჯაროვდა. ოპოზიცია და ხელისუფლება ერთ პოზიციაზე ვერ თანხმდება და თემა ისევ პოლიტიკური დაპირისპირების მიზეზია. თოქ-შოუს „პირისპირ“ წამყვანის, ირაკლი ჩიხლაძის კითხვებს იუსტიციის მინისტრმა თეა წულუკიანმა უპასუხა.

- მე ბევრად მეტი კითხვა მაქვს, ვიდრე კომისიამ დასვა და მოდით, თანმიმდევრობით დავიწყოთ. პირველ რიგში მაინტერესებს, რატომ უნდა გადამდგარიყო და არ გადადგა იუსტიციის მინისტრი?

- მე შეძლებისდაგვარად ვუსმინე ჩემ წინარე გამომსვლელებს. პირველი რეაქცია რაც მაქვს და ალბათ, იმ კითხვას უპასუხებს, რაც თქვენ დამისვით, გაკვირვებაა. გაკვირვება იმის შესახებ, რომ ეს როგორი ენაწყლიანი ყოფილა ბატონი სერგი კაპანაძე, რომელმაც ხმა ვერ ამოიღო, როდესაც მე, სხვათა შორის მომზადებული, როგორც პასუხისმგებლიანი იუსტიციის მინისტრი, მათი იუსტიციის მინისტრისგან განსხვავებით, როგორც კი პარლამენტმა, ვინც არ უნდა იყოს მისი წევრი, დამიბარა და მივედი კომისიის სხდომაზე. მაშინ მისი არც ხმა გაგვიგია, მე არ გამიგია და არც კითხვა დაუსვამს, შესაბამისად, ახლა რაც არ უნდა იბაქიბუქოს და ირტყას გულზე ხელი, რომ ქარცეცხლში გავატარებდიო, იქ ვიყავი მეც, იქ იყო ისიც და შეეძლო ეს ქარცეცხლი მაშინ მოეწყო.

რაც შეეხება მათ ამჟამინდელ ძალიან მძიმე მდგომარეობას, ვგულისხმობ „ევროპულ საქართველოს“, იგივე „ნაციონალური მოძრაობის“ წევრებს, რომლებიც ამ კომისიის უმრავლესობაში გახლდნენ, მე ვთვლი, რომ მათ განიცადეს პოლიტიკური კრახი, ეს ბევრჯერ ვთქვი, საზოგადოება მოატყუეს, საზოგადოების ის პირველ ფლანგზე მყოფი ადამიანები, ვინც არიან დაზარალებულები, ოჯახის წევრები, პირველ რიგში დედები, მამები, დები, ძმები და სხვები და ვინც ამ კომისიისგან რაღაც სიახლეს ან ხელშესახებ შედეგს მოელოდა. მათ თქვეს ბევრი სერიოზული რამ, თქვეს ასევე მნიშვნელოვანი რამ, თუ გავიხსენებთ ყოფილ განცხადებებს, რომ მაგალითად „ჩვენ გამოვავლენთ მკვლელს“...

- ცოტა ხნის წინ აქ ითქვა, რომ მათ ასეთი რამ არ უთქვამთ და მაგალითად, სერგი კაპანაძემ თქვა, მოძებნეთ არქივში თუ ეს განცხადება მაქვს გაკეთებულიო.

- ამას ვამბობ სწორედ. მათ თქვეს, რომ აი, მაგალითად ჩვენ კომისიაში ექსპერტად მოგვყავს ვინმე ზაზა ჭაია, „ვინმეს“ ვამბობ, თორემ ძალიანაც ავად ცნობილი ადამიანია და ირაკლი ქადაგიძეო. კომისიის ერთ-ერთმა წევრმა თქვა, ესენი იქნებიან ისინი, ვინც ამ ქალაქში 100-ზე მეტი მკვლელობა...

- მე მაყურებლისთვის განვმარტავ, საუბარია შინაგან საქმეთა სამინისტროს ყოფილ თანამშრომლებზე.

- დიახ, რომლებიც ადრე, წინა ხელისუფლების დროს, ალბათ, თვითონვე დგამდნენ დანაშაულებს და თვითონვე ხსნიდნენ, თუ ამას გახსნა ერქვა. ეს ადამიანები ახლა არიან არასამთავრობო ორგანიზაციებში, ექსპერტად წოდებულები, რომლებზეც „ევროპულმა საქართველომ“ გამოაცხადა, რომ მათი ექსპერტები იქნებოდნენ, იმიტომ რომ, ამ ქალაქში 100-ზე მეტი მკვლელობა აქვთ გახსნილი და ამ მკვლელობასაც ჩვენთან ერთად გახსნიანო და ეს მოლოდინი შექმნეს. ასევე შექმნეს, მაგალითად, ყველაზე ვერ შევჩერდები, მოლოდინი იმასთან დაკავშირებით, რომ აღმოაჩენდნენ იმ დამატებით ცივ იარაღს ან იარაღებს, რომლებიც დამალა საგამოძიებო ორგანომ, რომელიც, სხვათა შორის, მე არ გახლავართ და არც გახლდით. სწორედ აი ამ ვაკქანალიის კვალდაკვალ გავერკვიე ამ საქმეში და ფაქტები შეძლებისდაგვარად შევისწავლე, თორემ პროკურატურის შესახებ კანონი 2013 წლის მაისში შევიდა ძალაში, მეც ვიყავი მისი შემოქმედი და ჩემი და ჩემი სხვა კოლეგების მონაწილეობით ვთქვით, რომ იუსტიციის მინისტრი აღარ იქნება მთავარი პროკურორი და მას ავუკრძალეთ, რომ გავამარტივო, ჩემს თავს ავუკრძალე ის, რომ ჩავრეულიყავი რომელიმე სისხლის სამართლის საქმეში. ამ ადამიანებს, მგონი, ეს კანონი არ ჰქონდათ წაკითხული, ჩემი დაბარების შემდეგ წაიკითხეს და უკვე კითხვებიც ვერ დასვეს. თუმცა კითხვები რატომ ვერ დასვეს, ამაზე კიდევ ჩემი მოსაზრებები მაქვს. იმიტომ რომ, ვინმე სერგი კაპანაძისთვის ჩემი ქარცეცხლში გატარება ძალიან მარტივი მაინცდამაინც არ უნდა იყოს. თუ არა, კიდევ ვიმეორებ, იქ ვიყავი მე, იქ იყო ისიც და ასე ვთქვათ, დუმილის უფლება გამოიყენეს საპარლამენტო უმცირესობის წევრებმა.

- მან თქვა, რომ ერთადერთი რამ გვაინტერესებდა, რატომ დაუჭირა და რატომ უჭერდა ირაკლი შოთაძეს მხარსო. იმ რეკომენდაციების მიხედვით, რომელიც ჩვენ უკვე ვნახეთ და იქ საუბარია ცალკეულ გადაცდომებზე, თქვენ დღესაც იმავეს ამბობთ, რომ ირაკლი შოთაძე არ უნდა გადამდგარიყო იმ დროს, როდესაც გადადგა?

- მე ვთვლი, რომ ამ ვაკქანალიის პირობებში, რომელიც მაშინ შეიქმნა, პროცესი მთლიანად გაპოლიტიზირდა. ახლაც თავიდან ბოლომდე პოლიტიზებულია ეს ტრაგედია და კიდევ  უფრო დიდ ტრაგედიად იქცა თითოეული ბავშვისთვის, იქნება ეს მოკლული, უკვე გარდაცვლილი, მისი დედა, მამა. რაც არ უნდა ვინმე ამბობდეს, თუ რატომ აქტიურობს პოლიტიკოსებთან ერთად შვილმკვდარი მამა, მე ამას არ ვიზიარებ. უნდა და აქტიურობს. ის ასე თვლის საჭიროდ. სამაგიეროდ, არ დაგიმალავთ და ძალიან ბევრს ვფიქრობ იმ დედაზე, რომელიც არ აქტიურობს ასე, მაგრამ მის გულში, ალბათ, ათასჯერ და ათიათასჯერ უფრო დიდი ცეცხლი ტრიალებს. აქეთ არიან ბავშვები, რომელთა გვარებს ყველა ბრუნვაში ატრიალებენ. ჩემი გვარი სერგი კაპანაძეს და მისთანებს შეუძლიათ ყველა ბრუნვაში ატრიალონ, თან იშვიათი გვარია და ემანდ არ დაავიწყდეთ, ხშირად გაიმეორონ ეს გვარი, მაგრამ ვინმეს უფიქრია ბავშვებზე? ბავშვთა გამოკითხვაში ტრენინგი რომ გაიარეს, სანამ ბავშვებს დაკითხავდნენ თუ გამოკითხავდნენ და ტრენინგი გავიარეთ, ამაში ფული დავხარჯეთო, ამაყად რომ უწერიათ თავიანთ დასკვნაში, ეს ტრენინგი რომ გაიარეს, რა გაიგეს ამ ტრენინგიდან, რომ ყველა ბრუნვაში ატრიალეს იმ ბავშვების გვარები, რომლებსაც დღესაც დანაშაულის პრეზუმფცია იცავს, რომლებიც 3-ჯერ და 4-ჯერ ჩვენზე უმცროსები არიან ლამის და მათ წინააღმდეგ საფუძვლიანი სამხილი არც მაშინ არსებობდა და არც ახლა ეგრეთ წოდებული დასკვნის შედეგად არსებობს და ყველა ბრუნვაში ატრიალეს მაინც. დღეს კი მოდიან აქ და მ.კ-ებით მელაპარაკება ეს ხალხი. დიახ, კალანდიაა ამ ბავშვის გვარი, ახლა ვითომ მ.კ-თი რომ მოიხსენიებენ, რომ ვითომდა მისი უფლებები დაიცვან, აქციაზე თუ ყველგან ატრიალეს ყველა ბრუნვაში, ლინჩის წესით გაასამართლეს ეს და სხვა ბავშვები... მე არ ვიცი ვინ რა ჩაიდინა, სანამ არ არის მტკიცებულება, ეს ვთქვი, როდესაც კომისიიდან გამოვედი, როგორც ამ საზოგადოების რიგითმა წევრმა და როგორც ამ ქვეყნის იუსტიციის მინისტრმა და ერთ-ერთმა ავტორმა „ბავშვთა მართლმსაჯულების კოდექსის“, რომელმაც მოიტანა ის, რომ კაპანაძეების, კახიძეების და მისთანების მსგავსი ჭაიები და ქადაგიძეები ვერასდროს ვეღარ ჩაყრიან მურაბის ქურდობისთვის ბავშვებს 5-6 წლით ციხეში. დიახ, ეს ადამიანი ვარ მე, სხვა ჩემ კოლეგებთან ერთად და ვამბობ ხმამაღლა, რომ სანამ არ არსებობს მტკიცებულებები, ვერც ერთი ბავშვი ვერ წავა ციხეში. წინააღმდეგ შემთხვევაში ჩვენ დავემსგავსებით იმათ, ვინც 8 წლის წინ მოვიშორეთ ხელისუფლებიდან. საქმე უნდა გავხსნათო - კიდევ ერთხელ მოვუწოდებ მათ - გახსნან ეს საქმე სასწრაფოდ, დიდი ექსპერტების, ჭაიას და ქადაგიძის დახმარებით, ადეიშვილის მოადგილის ოთო კახიძის თუ ოთარ კახიძის მაღალი მონაწილეობით და ბატონი, ენაწყლიანი სერგი კაპანაძის მეშვეობით, რომელმაც ერთი კითხვა ვერ დამისვა, მაშინ, როდესაც ჩემ გადადგომას ითხოვდა და დამნაშავედ მაცხადებდა.

- რატომ ვერ დაგისვათ კითხვები? საზოგადოების ნაწილს გაუჩნდა შეკითხვა სწორედ ამ თემასთან დაკავშირებით. იყო მოლოდინი, რომ ძალიან მწვავე იქნებოდა თქვენი და კომისიის წევრების შეხვედრა, მაგრამ რატომღაც 5 წუთში დასრულდა, რატომ?

- რატომ და იმიტომ რომ, მათ შესანიშნავად იცოდნენ თავიდანვე, რომ იუსტიციის მინისტრი 2013 წლის მაისიდან აღარ არის გენპროკურორი, აღარ ხელმძღვანელობს გამოძიებას, ზედამხედველობის ფუნქცია აღარ აქვს, ისიც შესანიშნავად იციან, რაც არ უნდა არ მოვწონდე მე მათ და ეს ჩემთვის დიდი კომპლიმენტია, რომ მე ამას ეთიკის დონეზეც ვიცავ. მათ ვერასდროს ექნებათ თუნდაც ზედაპირული ინფორმაცია, აღარაფერს ვამბობ მტკიცებულებაზე, რომ რომელიმე გამომძიებელს ან პროკურორს, მით უმეტეს მოსამართლეს, ვაკადრო, მოდი ჩამახედე საქმეში. იმიტომ რომ, მე მეკრძალება და მე მაგალითს ვაჩვენებ სწორედ იმ ბავშვებს, რომლებიც მომავალში იუსტიციის მინისტრები გახდებიან. მათ თვალში კი საქართველოში მცხოვრები ბავშვი ყველა კრიმინალია და ეს მათ ლოგიკაშიც ჩანს, იმიტომ რომ, ათეულობით, ათასობით საქმე შეიძლება მათი მმართველობის პერიოდიდან ამოვიღოთ, როცა ბავშვებს ციხეში ყრიდნენ. შევადაროთ, მაშინ ასეულობით ბავშვი იყო ციხეში და დღეს მხოლოდ 38 ბავშვი შეიძლება იყოს. ბოლო რიცხვი არ მაქვს, მაგრამ ეს არის მათთან შედარებით სამაგალითო ციფრი, ევროპული სტანდარტიც კი ამაზე მაღალია დღეს, ევროპაში ბავშვები უფრო მეტნი სხედან ციხეში. რა თქმა უნდა, არ შეიძლება მათ ეს მოსწონდეთ. მათ იცოდნენ, რომ აქ იუსტიციის მინისტრის როლი არავითარი არ არის, მაგრამ მოდაშია იძახო იუსტიციის მინისტრის გვარი. ამიტომაც ჩემი ერთადერთი პასუხია: იმეორეთ ჩემი გვარი, იშვიათი გვარია და არ დაგავიწყდეთ.    

- მოდაშია ისიც, რომ დღემდე მოითხოვენ თქვენს გადადგომას?

- ჩემ გადადგომას მოითხოვენ, მაგრამ ჩემი გადადგომის მოთხოვნის უფლება და ამ პოზიციიდან გაშვების უფლება აქვს უმრავლესობას, რომელიც აირჩია ლეგიტიმური და სამართლიანი არჩევნების მეშვეობით ხალხმა. ოთარ კახიძისთვის და მისთანებისთვის არავის არ მიუცია უფლება მოითხოვოს და მით უმეტეს, მიაღწიოს ჩემს გადადგომას.

- რაც შეეხება რეკომენდაციებს?

- დიახ, რეკომენდაციებს რომ დავუბრუნდეთ, ჩემთან მიმართებაში არის ორი რეკომენდაცია, ერთი - რატომ თქვი, რომ შოთაძე არ უნდა გადამდგარიყო. პირდაპირ მინდა ვუთხრა: სასაცილოა თქვენი ეს რეკომენდაცია. მეორე არის - კომისიის სხდომიდან რომ გახვედი, რატომ თქვი, რომ მტკიცებულებების გარეშე ჩვენ არ ჩავყრით ბავშვებს ციხეშიო. ეს კი არის ბოროტების შემცველი რეკომენდაცია, რომ თურმე საქართველოს უნდა ჰყავდეს იუსტიციის მინისტრი, რომელიც „მტკიცებულებების გარეშე ბავშვებს არ ჩავყრი ციხეში“, ამას რომ იტყვის, უნდა დადგეს მისი პასუხისმგებლობის საკითხი. ეს არის კახიძე-კაპანაძე-ჭაია-ქადაგიძის დასკვნა, რომელიც არის პოლიტიკური კრახი და მე მათ ვუსამძიმრებ ძალიან ბევრჯერ. ისინი არიან „ნაციონალურ მოძრაობის“ გამოყოფილი დანაყოფი, ეგრეთ წოდებული „ევროპული საქართველო“, მათ ამ დასკვნაში არც ქართულია არაფერი და მით უმეტეს, არც ევროპული არ არის, ეს არის რაღაც ადეიშვილის სულისკვეთებით სავსე დასკვნა, რომელიც ამბობდა, რომ არ გვაქვს მტკიცებულებები, მერე რა, ჩავყაროთ ხალხი ციხეში, მით უმეტეს ბავშვები. ეს არის ლინჩის წესი. ერთი წუთით დავუბრუნდეთ დასკვნას, თითქოს ასე ითქვა, რომ აი, პოლიტიკური ელემენტები რომ არ იყოს, სამართლებრივად იქ ხარვეზები დადგინდა. რაღაც ხარვეზები დადგინდა და მე ეს უფრო მეტად დავინახე პარლამენტის პოლიტიკური უმრავლესობის მიერ გამოქვეყნებულ დასკვნაში. იქაც არის ჩემთვის სადავო საკითხები, მაგრამ ყოველ შემთხვევაში ნამუშევარი მაინც არის იმაზე, რომ ხარვეზები გამოასწორებინონ გამოძიებას. დღეს ბატონმა გახარიამ თქვა და არ შემიძლია ეს არ გავიზიარო, პირდაპირ თქვა სხდომაზე, რომ გამოძიებას შეიძლება ჰქონდეს და აქაც ჰქონდა ხარვეზები, მაგრამ ეს არ ნიშნავს იმას, რომ მთავარი პროკურორი უნდა გადადგეს, იუსტიციის მინისტრი მიეწიოს უკან, რომელსაც არაფერი არ დაუშავებია და დააბრალეს, რომ დანაშაულს ფარავო და ასე შემდეგ. ეს იყო პოლიტიკური სპექტაკლი, რომელიც დამთავრდა მათივე კრახით. მე ვამბობ, რომ „ნაციონალური მოძრაობა“, რომელმაც სახელიც შეინარჩუნა და არც იმის რცხვენია, რომ ლინჩის წესით ხალხს ასამართლებდა, ამაზე პასუხისმგებლობასაც იღებს და ამაზე ღიად ლაპარაკობს, მათ პოლიტიკური ჭკუა და გამოცდილება ეყოთ, ამ პოლიტიკურ სპექტაკლში არ ჩართულიყვნენ, იმიტომ რომ, უმრავლესობამ უთხრა, მოდით და გამოიძიეთ. როდესაც ჩვენ, „ქართულმა ოცნებამ“ ვუთხარით, მოდით, გამოიძიეთ, დაასახელონ მკვლელი. იმას კი ნუ იძახიან, რომ მ.კ., ეს არის კალანდია ბავშვი, რომელიც სააკაშვილმა დამნაშავედ გამოაცხადა, ამხელა კაცმა პატარა ბავშვი მტკიცებულებების გარეშე დამნაშავედ გამოაცხადა და ამ კალანდია ბავშვზე ამ დასკვნაში ასეთი რამ წერია, რომ მან ისე იაქტიურა, ჯგუფურ დანაშაულში დამხმარე გახდა. ჯგუფური დანაშაული თუა, ის მაინც გვითხარით ეს ბავშვი კალანდია ამსრულებელია, თანაამსრულებელია, თუ რა როლი აქვს?

- ისინი ამბობენ, რომ მტკიცებულებები გაანადგურეს და არანაირი მტკიცებულება არა არსებობს, რომლის მიხედვითაც შეიძლება უფრო მეტი დაადგინონ.

- მე სხვა რამეს ვამბობ. თქვენ თუ მათ დასკვნას ნახავთ, უწერიათ, რომ კალანდია უნდა იყოს პასუხისგებაში მიცემული იმიტომ რომ, აქტიურობდა, ის ჯგუფურ დანაშაულში დამხმარედ გვევლინებოდაო. თუ ჯგუფური დანაშაული იყო, მაშინ ეს კალანდია სულ მინიმუმ თანაამსრულებელი ხომ ყოფილა?! თუ დამხმარე იყო, მაშინ მსჯელობაში უფრო შორს უნდა წასულიყვნენ ასეთი მაღალი იურიდიული ექსპერტები რომ ჰყავდათ, ჭაია და ქადაგიძე და ის ეთქვათ, რომ დამხმარის ინსტიტუტის ქვეშ ამ კალანდიამ რა გააკეთა, წამქეზებელი იყო, თუ ვინ იყო ეს კალანდია, მაღალი დონის კრიმინალად რომ არის გამოცხადებული? ეგებ მართლა აქვს მკვლელობაში მონაწილეობა მიღებული, მაგრამ სად არის მტკიცებულებები? დადეთ მტკიცებულებები, დაასახელეთ მკვლელი. ისე არა, რომ იძახდით თავიდან. შეადარეთ ბატონი კახიძის ორი სხვადასხვა განცხადება. დიდი ჰედლაინი, ივნისში გამოქვეყნებული ახალი ამბის სათაური - ფარდული დაანგრია პოლიციამ. შემდეგ სექტემბერში - არ გვაქვს მტკიცებულებები, რომ ფარდული მითითებით დაინგრა. რა არის ეს, თუ არა პოლიტიკური უპასუხისმგებლობა და თუ არა პოლიტიკური მასკარადი და მათი პოლიტიკური კრახი.

- თქვენ როგორ ფიქრობთ, თუ გამოძიების მიმდინარეობისას ხარვეზები გამოიკვეთება, ვინ იქნება ამაზე პასუხისმგებელი? გასაგებია პოლიტიკური ნაწილი, მაგრამ საზოგადოების დიდ ნაწილს მაინც ამაზე აინტერესებს პასუხი - ხარვეზები, გადაცდომები. ვინ უნდა აგოს პასუხი?

- პასუხს ვერავინ ვერ აგებს, სანამ მიმდინარეობს ამ საქმეზე სასამართლოში განხილვა. არავის აქვს უფლება, არც მე, არც თქვენ და არც მაღალკვალიფიციურ ჭაიას და მის ამფსონებს „ევროპული საქართველო“ რომ ჰქვია, ჩაანაცვლოს ამ ქვეყანაში მოსამართლე. მოსამართლე, რომელმაც ჩვენი ხელისუფლების პირობებში გატარებული რეფორმების წყალობით და ძველი დროის დანიშნულმა მოსამართლემ ახლა რეფორმების შედეგად გაბედა და პროკურატურას უთხრა, მე არ ვიზიარებ შენს მტკიცებულებებსო. პროკურატურა და დაცვის მხარე არიან თანასწორი მხარეები მოსამართლის წინაშე, სანამ სასამართლო პროცესი არ დასრულებულა საბოლოო ინსტანციით და ამ საქმეზე არ დადგენილა ის, თუ რას ფიქრობს მოსამართლე, მანამდე მე არ ვფიქრობ, რომ ვინმეს პასუხისმგებლობა უნდა დადგეს ვიღაც პოლიტიკოსების ძახილზე, რომლებიც დღეს ერთს იძახიან, ხვალ - მეორეს: დღეს ეს გადადგესო; ახლა ეს არ მოეწონათ, რომ გადადგეს, გვითხრეს - მობრძანდითო. ეგონათ არ მივიდოდით. მივედით ფურცლებით მომზადებულები, სასაუბროდ მომზადებული. „კი“ და „არას“ რეჟიმში რომ მოგვევლინეთ გამომძიებლებად: ემხრობით შოთაძეს? კი თუ არა? კალანდია, მოკალი შენ სარალიძე? კი თუ არა? ეს არის მაგათი გამოძიება. ამ ხალხის დაძახილზე არ ვფიქრობ, რომ ვინმეს პასუხისმგებლობა უნდა დადგეს. შინაგან საქმეთა მინისტრმა, რომელიც არის ერთ-ერთი წამყვანი საგამოძიებო ორგანოს ხელმძღვანელი ამ ქვეყანაში თქვა, რომ საგამოძიებო საქმეს ზოგადად აქვს ხარვეზები ქვეყანაში, სწორედ ამ ხალხის დამსახურებით, დღეს რომ ექსპერტებად მოგვევლინნენ და ეს ხარვეზები უნდა გამოსწორდეს. მე თუ ჩემ აზრს მეკითხებით, სანამ მოსამართლე, სავარაუდოდ უზენაესი, თავის საბოლოო სიტყვას არ იტყვის, არ შეიძლება ამ საქმეზე რაიმე ტიპის დასკვნების გაკეთება. წინააღმდეგ შემთხვევაში ჩვენ ვიჭრებით მართლმსაჯულებაში, ბოლომდე ვანულებთ შანსებს იმისას, რომ ამ ქვეყანაში მართლმსაჯულება განხორციელდეს. მე ვფიქრობ, რომ საკმარისია მოკლულთა ოჯახების მოტყუება, საკმარისია იმ ბავშვების ყველა ბრუნვაში ტრიალი და შემდეგ მ.კ, პ.კ-ს ძახილი, ვითომდა მათ უფლებებს ვიცავთ და მათი დამნაშავედ შერაცხვა, სანამ არ დამთავრებულა სასამართლო განხილვა.

წყარო :