13 ნოემბერს საქართველოს მართლმადიდებელი ეკლესია წმიდა ასი ათასი ქართველი მოწამის ხსენების დღეს აღნიშნავს.

ახალგაზრდული მოძრაობა „დავითიანნის“ ხელმძღვანელის კოტე სვანაძის ინფორმაციით, ამასთან დაკავშირებით მსვლელობები წელს დაგეგმილი არ არის, სადღესასწაულო ღონისძიებები კი მეტეხის ხიდზე 17:00 საათზე დაიწყება. ნაჩვენები იქნება სხვადასხვა კოლექტივების შემოქმედებითი ნომრები, ასევე, იმ პერიოდის ამსახველი მონო–სპექტაკლი. შემდეგ კი სრულიად საქართველოს კათოლიკოს-პატრიარქი, ილია II, მღვდელმთავრებთან და სასულიერო პირებთან ერთად, საზეიმო პარაკლისის გადაიხდის.

პარაკლისის დასრულების შემდეგ მრევლი და სასულიერო პირები მტკვარში წამებულთა პატივისცემის ნიშნად ყვავილებს ჩაყრიან. ასევე, ცაში ფრანებს გაუშვებენ.

ხორეზმის სახელმწიფოს გამგებელმა, ჯალალ ედ-დინმა 1227 წელს თბილისი აიღო. მისი ბრძანებით, სიონის საპატრიარქო ტაძარს გუმბათი მოხსნეს, სადაც ჯალალ ედ-დინისთვის ტახტი დადგეს. სიონის ტაძრიდან ღვთისმშობლისა და მაცხოვრის ხატები გამოაბრძანეს და მეტეხის ხიდზე გაიყვანეს. თბილისელებს აიძულებდნენ, ქრისტეს უარყოფის ნიშნად, ჯერ დაენერწყვათ, შემდეგ კი ფეხით გაეთელათ წმიდა ხატები, წინააღმდეგ შემთხვევაში კი თავების წარკვეთით ემუქრებოდნენ. 100 000-მა ქართველმა სულიერი სიმტკიცე გამოიჩინა. მათ ხატებს თაყვანი სცეს და ბრძანებას არ დაემორჩილნენ, რის გამოც ასი ათასი მოჭრილი თავი და თავწარკვეთილი სხეული მტკვარს გაატანეს.

ამ დღეს ქართველმა ერმა სარწმუნოებისათვის თავდადებული 100 000 მფარველი შეიძინა.