შორენა ბეგაშვილმა გუშინ ევას მეოთხე ოპერაციის წინ სოციალურ ქსელში სტატუსი გამოაქვეყნა, სადაც მადლობას უხდის დახმარებისთვის სახელმწიფო უწყებებს და ასევე კრიტიკულად განწყობილ საზოგადოებას პასუხობს. მის „ფეისბუქ"-სტატუსს საქართველოს პირველი ლედი მაკა ჩიჩუა ეხმაურება:


„შორენა!!!! საყვარელო!!! არავისთან არ გაქვს თავი სამართლებელი... შენ კარგი დედა და კარგი გოგო ხარ! მე ასეთს გიცნობ.
შენს საოცად ლამაზ გოგოს კი ხალისიან, ნათელ მომავალს ვუსურვებ შენთან ერთად", - წერს მაკა ჩიჩუა.

შეგახსენებთ შორენა ბეგაშვილისს სტატუსს:


„ბინა კრედიტით მაქვს, გადაამოწმეთ, გეხერხებათ. რომ გავყიდო, ბანკში უნდა ჩავრიცხო...მანქანა, შუბა და ყველაფერი იყიდება. მოდით და იყიდეთ. ასეთი ხალხის გამო ვიკავებდი თავს ძვირადღირებულ მკურნალობაზე და თვე და ორი კვირა ვუყურებდი სიცხიან ბავშვს, ტკივილები როგორ ტანჯავდა. ყოველთვის ისე ვცხოვრობდი, რომ არავის წამოსაყვედრებელი არ მქონოდა რამე. პირიქით, იქით ვეხმარებოდი, როგორც შემეძლო. მე კიდევ დავიწყებ ნულიდან ცხოვრებას და უკეთესი ჯიპიც მეყოლება, შუბაც და ბევრი ის ნივთი, რომელიც უკვე გაიყიდა. ახლა, როცა გაქექეთ ჩემი ცხოვრება, გეტყვით, რომ ევას საოპერაციოდ ამზადებენ. ბოლო ორი თვის მანძილზე მეოთხე ოპერაციაა. მაინც ყველაზე ლამაზია. მადლობა მერიას, ჯანდაცვის სამინისტროს, ანუკის და კახა კალაძეს. მათი წყალობით, ევას პირველი ოპერაციის ნახევარი დაფინანსდა და არ გეგონოთ, მარტო ჩემს შვილს აფინანსებენ. ბევრი ქართველი წევს აქ მათი დახმარებით. მადლობა ქართველ ემიგრანტებს, რომლებიც აქ ყურადღებას არ გვაკლებენ. წინ რთული დღეებია, მაგრამ კარგად იქნება ჩემი გოგო, უნდა გაიაროს და იცეკვოს ისევ, ისევ უნდა მომპაროს ფეხსაცმელი და გამიფუჭოს. 
მადლობა, რომ მარტო არ დამტოვეთ".