შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორის ვლადიმერ ბორცვაძის განცხადებით, უწყებას პირადი ცხოვრების ამსახველ ფარულ ჩანაწერებთან დაკავშირებული არაერთი საქმე აქვს გამოძიებული, თუმცა მათი აფიშირება არ ხდება. ამის შესახებ ბორცვაძემ ტელეკომპანია „იმედის“ ეთერში განაცხადა.

„აღნიშნულ დანაშაულთან დაკავშირებით სტატისტიკა, რა თქმა უნდა, გვაქვს, თუმცა კონკრეტული ციფრების დასახელებისგან თავს შევიკავებ, მაგრამ ამ კატეგორიის სისხლის სამართლის არაერთი საქმე გვაქვს გამოძიებული. შესაძლოა, მასშტაბი და გავრცელება ასეთი არ ყოფილა, თუმცა მსგავსი საქმეების გამოძიება ნამდვილად შეგვიძლია. თუ დანაშაულის ჩამდენ პირებს ჰგონიათ, რომ შეუძლებელი იქნება მათ კვალზე გასვლა, ძალიან ცდებიან. ხშირად ყოფილა შემთხვევა, როცა რომელიმე ადამიანი პირადი მიზნებისთვის ჩადის მსგავს დანაშაულს, საქმეს ვხსნით, თუმცა აღნიშნული საქმეების აფიშირებას არ ვახდენთ დაზარალებულის ინტერესებიდან გამომდინარე. მსგავს დანაშაულებთან დაკავშირებით შესაძლოა დიდი ძალისხმევა გახდეს საჭირო, დროში ცოტა გაიწელოს, თუმცა ამ ადამიანებს აუცილებლად მივაგნებთ. ჩვენ ვთანამშრომლობთ ტექნოლოგიურ კომპანიებთან ამ მიმართულებით, ინტერნეტ-პროვაიდერებთან, facebook-თან და ა.შ.“, - განაცხადა ბორცვაძემ.