„შავი ზღვა მშვიდობისა და მდგრადი განვითარების რეგიონად უნდა იქცეს, სადაც ქვეყნები თავიანთ ერთიან ძალისხმევას სტაბილურობის განმტკიცებისა და კეთილდღეობის გაუმჯობესებისკენ მიმართავენ“, – ამის შესახებ საქართველოს საგარეო საქმეთა მინისტრმა დავით ზალკალიანმა შავი ზღვის უსაფრთხოების საკითხებისადმი მიძღვნილ ღონისძიებაზე სიტყვით გამოსვლისას განაცხადა. ინფორმაციას საგარეო საქმეთა სამინისტრო ავრცელებს.

უწყების ცნობით, დავით ზალკალიანმა მთავარი აქცენტი შავი ზღვის რეგიონის უსაფრთხოებასა და რეგიონში NATO-ს როლის გაძლიერებაზე გააკეთა. მისი თქმით, შავი ზღვის აუზში NATO-ს გაძლიერება რეგიონის მშვიდობასა და სტაბილურობას შეუწყობს ხელს.

ამასთან, შავ ზღვაზე ძლიერი და სანდო პარტნიორების არსებობა ალიანსისთვისაც თანაბრად მნიშვნელოვანია.

როგორც ზალკალიანმა სიტყვით გამოსვლისას განაცხადა, საქართველო ენთუზიაზმით დაუჭერს მხარს შავ ზღავზე NATO-ს გაძლიერებულ ჩართულობას. ამ კონტექსტში, მან ალიანსის ყოვლისმომცველი და გრძელვადიანი სტრატეგიის აუცილებლობაზეც ისაუბრა, რომელიც უსაფრთხოების წინაშე მდგარ გამოწვევებს შავი ზღვის NATO-ს წევრი და პარტნიორი ქვეყნების აქტიური მონაწილეობით გაუმკლავდება.

„უსაფრთხო შავი ზღვის გარეშე, შეუძლებელია არსებობდეს უსაფრთხო ევროპა, ამიტომ არავისთვის გასაკვირი არ უნდა იყოს, რომ NATO-ს განსაკუთრებით აშფოთებს რუსეთის მიერ ყირიმის ანექსია, კრიზისი, რომელიც მან შექმნა აღმოსავლეთ უკრაინაში და აზოვის ზღვაში. ყოველივე ეს აშკარას ხდის რუსეთის სტრატეგიას: გამოიყენოს ძალა თავისი პოლიტიკური მიზნების მისაღწევად, რეგიონის სხვა სუვერენული სახელმწიფოების ხარჯზე. აშკარაა, რომ რუსეთის მიზანია, დააშინოს რეგიონში დასავლეთის მოკავშირე ქვეყნები და შექმნას ახალი გამყოფი ხაზები და ე.წ. გავლენის სფეროები ევროპაში“, – განაცხადა ზალკალიანმა.

მინისტრმა ვრცლად ისაუბრა რუსეთის პოლიტიკაზე, დააშინოს რეგიონის NATO-ს მოკავშირე ქვეყნები და შექმნას ახალი გამყოფი ხაზები და გავლენის სფეროები ევროპაში.

ზალკალიანის თქმით, საქართველოს ტერიტორიების ოკუპაცია და მილიტარიზაცია, ყირიმის ანექსია და აღმოსავლეთ უკრაინასა და აზოვის ზღვაში შექმნილი კრიზისი ერთი სქემის მიხედვით ხორციელდება.

„ყირიმამდე და აღმოსავლეთ უკრაინამდე, სქემას საფუძველი საქართველოში ჩაეყარა. საქართველო ოთხმოცდაათიანი წლების დასაწყისიდან უმკლავდება ჩრდილოელი მეზობლის მიერ წარმოებულ სრულმასშტაბიან ჰიბრიდულ ომს. მაშინვე ცხადი იყო, რომ რუსეთი არ აპირებდა წესებზე დაფუძნებულ საერთაშორისო წესრიგთან შეგუებას და რეგიონში დაკარგული დომინანტური პოზიციის დაბრუნებისთვის ემზადებოდა.

თითქმის ორი ათწლეულის განმავლობაში მიმდინარე გამოუცხადებელი ომი 2008 წელს ორ ქართულ რეგიონზე პირდაპირი შეიარაღებული თავდასხმითა და ამ რეგიონების ოკუპაციით გაგრძელდა. რუსეთი განაგრძობს აღნიშნული ტერიტორიების ოკუპაციას, ექსპანსიასა და მილიტარიზაციას და მან უკვე გადადგა ნაბიჯები საქართველოს სუვერენული რეგიონების ანექსიის მიმართულებით“, – განაცხადა ზალკალიანმა.

მისი თქმით, შავი ზღვის რეგიონთან დაკავშირებით NATO-მ დროულად უნდა შეიმუშავოს უფრო ყოვლისმომცველი და მიზანმიმართული სტრატეგია.

დავით ზალკალიანის განცხადებით, საქართველო მოკავშირეებთან ერთად, აქტიურად მუშაობს შავი ზღვის უსაფრთხოების განმტკიცების მიმართულებით და უკვე მნიშვნელოვან პროგრესსაც მიაღწია, კერძოდ, თავდაცვის სფეროში ალიანსთან თანამშრომლობის გაძლიერების კუთხით, მათ შორის, NATO-საქართველოს არსებით ღონისძიებათა პაკეტის ფარგლებში.

„ჩვენმა ქვეყანამ არაერთხელ დაამტკიცა, რომ ის მზად არის მხარი დაუჭიროს NATO-ს ინიციატივების გაძლიერებასა და თანამშრომლობის გაღრმავებას. ჩვენ NATO-ელი მოკავშირეების გვერდით ვიდექით ყოველთვის და ყველგან, სადაც კი ჩვენი მხარდაჭერა საჭირო იყო. მზად ვართ, უფრო მეტი წვლილის შესატანადაც, განსაკუთრებით როდესაც საქმე შეეხება უსაფრთხოებას უშუალოდ ჩვენს სიახლოვეს“, – დასძინა მინისტრმა.

ზალკალიანმა ხაზგასმით აღნიშნა, რომ NATO-სა და ევროკავშირის წევრი ქვეყნებიც ხშირად წარმოადგენენ რუსეთის პირდაპირ სამიზნეს და „რუსეთის მიერ ვალდებულებების მუდმივი შეუსრულებლობა ძირს უთხრის ევრო-ატლანტიკურ უსაფრთხოებას“.

საგარეო საქმეთა მინისტრმა განსაკუთრებული ყურადღება NATO-ს ღია კარი პოლიტიკის მნიშვნელობაზე გაამახვილა. მისი თქმით, „ღია კარის პოლიტიკა შავი ზღვის რეგიონში უსაფრთხოების გაძლიერებისა და NATO-ს აღმოსავლეთ ფლანგზე არსებულ გამოწვევებთან ეფექტიანად გამკლავების ყველაზე რეალური შესაძლებლობაა“.

ამასთან, როგორც მინისტრმა აღნიშნა, ეს არის მნიშვნელოვანი გზავნილი, რომ საქართველო თავისი სტაბილური დემოკრატიით, ძლიერი სახელმწიფო ინსტიტუტებითა და მზარდი ეკონომიკით მზად არის NATO-ში გასაწევრიანებლად და ის ალიანსის წევრი გახდება.

საგარეო საქმეთა მინისტრი დავით ზალკალიანი, პრემიერ-მინისტრ მამუკა ბახტაძის ხელმძღვანელობით საქართველოს დელეგაციასთან ერთად, მიუნხენის უსაფრთხოების 55-ე კონფერენციაში მონაწილეობს.

მინისტრი გერმანიის ატლანტიკური ასოციაციისა და მიუნხენის უსაფრთხოების კონფერენციის მიერ ორგანიზებულ დისკუსიაში სიტყვით გამოვიდა.