„საქართველოს პრეზიდენტი სალომე ზურაბიშვილი დღეს საქართველოს დაზვერვის სამსახურს ესტუმრა და დაზვერვის სამსახურის უფროსს დავით სუჯაშვილსა და სამსახურის თანამშრომლებს შეხვდა“, - ამის შესახებ ინფორმაციას პრეზიდენტის ადმინისტრაცია ავრცელებს.

საქართველოს პრეზიდენტი ადგილზე გაეცნო დაზვერვის სამსახურში მიმდინარე რეფორმასთან დაკავშირებულ საკითხებს.

შეხვედრისას საუბარი შეეხო საქართველოს წინაშე მდგარ გამოწვევებს, რეგიონული უსაფრთხოების საკითხებსა და საქართველოს საგარეო ურთიერთობების მნიშვნელოვან ასპექტებს.

სალომე ზურაბიშვილის განცხადებით, დაზვერვის სამსახურში მუშაობენ სამშობლოსათვის თავდადებული ადამიანები და ეს სახელმწიფო სტრუქტურა ძალიან მნიშვნელოვანია ისეთი ქვეყნისთვის, როგორიც საქართველოა.

„ჩვენი მომავალი საფრთხეებისგან დაცვა დიდწილად ამ ადამიანების საქმიანობაზე გადის და საჭიროა, რომ საზოგადოებამ იცოდეს, რამდენად მნიშვნელოვანი და პოზიტიურია ეს. ახალგაზრდებმა კი იცოდნენ, რომ ასეთ სამსახურში მონაწილეობა ნამდვილი პატრიოტიზმია“, - აღნიშნა სალომე ზურაბიშვილმა.