„მთავარი გაკვეთილი, რომელიც ჩვენმა ერმა გამოიტანა ამ 25 წლის განმავლობაში, არის ერთიანობის აუცილებლობა", - ამის შესახებ საქართველოს პრემიერ-მინისტრმა გიორგი კვირიკაშვილმა მეორე დიასპორულ პროფესიულ ფორუმზე სიტყვით გამოსვლისას განაცხადა.

პრემიერმა ფორუმის მონაწილეებს დამოუკიდებლობის აღდგენის 25 წლისთავი მიულოცა და მადლობა გადაუხადა სახელმწიფო მინისტრს დიასპორის საკითხებში გელა დუმბაძეს არაერთი მნიშვნელოვანი ინიციატივისთვის, რომელიც მთავრობამ განახორციელა და რომელმაც „გააიოლა დიასპორის წარმომადგენლებისთვის ცხოვრება".

„ჩვენ გავიარეთ ურთულესი გზა განვითარების, წარმატებების, დაპირისპირების. განვიცადეთ არაერთი მარცხი და გამოვიტანეთ მნიშვნელოვანი გაკვეთილები. მთავარი გაკვეთილი, რომელიც ჩვენმა ერმა გამოიტანა ამ 25 წლის განმავლობაში ეს არის ერთიანობის აუცილებლობა. ჩვენ პატარა ერი ვართ, არ გვაქვს უფლება, ვიყოთ გახლეჩილი; არ გვაქვს უფლება, ტალახი ვესროლოთ ერთმანეთს. ჩვენ უნდა განვვითარდეთ ერთი საერთო დადებითი მიზნის გარშემო - განვავითაროთ ჩვენი ქვეყანა და ვაქციოთ ის მართლა დამოუკიდებელ, თავისუფალ ქვეყნად. ამისთვის ყველა თქვენგანის ჩართულობა ძალიან მნიშვნელოვანია. ჩვენი მიზანია, თანამემამულეებს, რომლებიც მსოფლიოს სხვადასხვა ადგილებში ცხოვრობენ, მაქსიმალურად დავანახოთ ის შესაძლებლობები, რომლებიც არსებობს დღეს ჩვენს ქვეყანაში დაბრუნებისათვის. დღეს ჩვენ გვაქვს არაერთი მექანიზმი შექმნილი იმისთვის, რომ ჩვენი დიასპორა იყოს ჩართული ჩვენი ქვეყნის განვითარებაში", - განაცხადა პრემიერმა და ამის ერთ-ერთ მაგალითად დაასახელა ახალგაზრდა ელჩების პროგრამა.

მისი თქმით, საქართველომ გახსნა არაერთი შესაძლებლობა, რომ დიასპორის წარმომადგენლებმა ბიზნესი დაიწყონ საქართველოში, მათ შორის, პროგრამა „აწარმოე საქართველოში".

„ჩვენს სახელმწიფოს განსაკუთრებული მიდგომა აქვს იმ ინიციატივების მიმართ, რომელსაც ჩვენი დიასპორის წარმომადგენლები იჩენენ. ეს და არაერთი კიდევ სხვა ინიციატივა იძლევა საშუალებას, ჩვენი თანამოქალაქეები დაბრუნდნენ საქართველოში და ის შესაძლებლობები, რომლებიც იქმნება დღეს ქვეყანაში და განვითარების ის დღის წესრიგი, რომელიც არსებობს, გამოიყენონ მაქსიმალურად, რათა საკუთარი ოჯახები არჩინონ და ის ურთულესი ცხოვრება, რომელიც ბევრ ჩვენს თანამემამულეს გააჩნია უცხოეთში, შეცვალონ უკეთესობისკენ. ზოგიერთი ადამიანი შეიძლება დაბრუნდეს, ზოგიერთმა შეიძლება ეს ახლო მომავლისთვის გადადოს, ზოგიერთმა შეიძლება გააგრძელოს მოღვაწეობა უცხოეთში - ჩვენ ყველა თქვენგანისთვის უნდა ვიყოთ გახსნილები, ყველა თქვენგანის ჩართულობა გვჭირდება. არა აქვს მნიშვნელობა თუ რომელ სოციალურ ფენას მიეკუთვნება და რომელ ქვეყანაშია ჩვენი თანამემამულე, ყველას უნდა ჰქონდეს საშუალება, ჩაერთოს ქვეყნის განვითარების საქმეში", - განაცხადა გიორგი კვირიკაშვილმა.

პრემიერის თქმით, უკანასკნელი წლების განმავლობაში არაერთ ქვეყანაში შეხვედრია ქართული დიასპორის წარმომადგენლებს, რომლებიც იმედიანად არიან განწყობილნი.

„ჩვენ არ გვაქვს უფლება, არ გავამართლოთ ეს იმედები და არ შევქმნათ ის წინაპირობები, რომლებიც საშუალებას მოგვცემს, კიდევ ერთხელ გავერთიანდეთ. მინდა გამოვთქვა მზადყოფნა მთელი მთავრობის სახელით, რომ გაგიხსნათ შესაძლებლობები ჩვენს ქვეყანაში, გავხსნათ ჩვენი გულები იმისთვის, რომ კიდევ ერთხელ გავერთიანდეთ", - დასძინა პრემიერ-მინისტრმა.

პრემიერმა ასევე ხაზი გაუსვა საქართველოს ეკლესიის მიერ გადადგმულ მნიშვნელოვანი ნაბიჯებს საზღვარგარეთ ქართული კულტურის კერების შენარჩუნებაში.