„შემაშფოთებელია მზარდი მილიტარიზაცია, რომელსაც თვალ-ყურს ვადევნებთ, როგორც აფხაზეთში, ასევე ცხინვალის რეგიონში“, - ამის შესახებ პარლამენტის თავმჯდომარე ირაკლი კობახიძემ ოკუპირებულ აფხაზეთში სამხედრო სწავლებასთან დაკავშირებით განაცხადა.

კობახიძის თქმით, საქართველოსთვის ძალიან მნიშვნელოვანია ამ კუთხით საერთაშორისო თანამეგობრობის თანადგომა.

„ჩვენთვის შემაშფოთებელია ზოგადად, მზარდი მილიტარიზაცია, რომელსაც თვალ-ყურს ვადევნებთ სამწუხაროდ, როგორც აფხაზეთში, ასევე ცხინვალის რეგიონში. ეს წვრთნებიც არის ამის ერთ-ერთი გამოხატულება. ჩვენთვის მნიშვნელოვანია საერთაშორისო თანამეგობრობის თანადგომა ამ კუთხით და ბუნებრივია, გაგრძელდება კონსულტაციები, რომ მაქსიმალურად ავირიდოთ პრობლემები, რაც დაკავშირებულია მილიტარიზაციასთან“, - განაცხადა ირაკლი კობახიძემ.

ოკუპირებულ აფხაზეთში სამხედრო სწავლება მიმდინარეობს, რომელშიც 3 000 ჯარისკაცი მონაწილეობს.