„ამ ქვეყანაში მედიის თავისუფლება დაცულია, მიუხედავად მათი პოლიტიკური ინტერესებისა თუ შეხედულებებისა“, - ამის შესახებ „რუსთავი 2“-ის ირგვლივ განვითარებულ მოვლენებთან დაკავშირებით საპარლამენტო უმრავლესობის წევრმა ირაკლი სესიაშვილმა განაცხადა.

მისი თქმით, მან კონკრეტული საქმე ზედმიწევნით არ იცის.

„სამწუხაროდ, არ მქონდა საშუალება, რომ „რუსთავი 2"- ის საქმეზე თვალყური მედევნებინა. დამატებით არაფრის თქმა არ შემიძლია. როგორც ჩემთვისაა ცნობილი, მეწილეებს შორის არის დავა. დეტალები არ ვიცი. ერთი რამ ცხადია, რომ ამ ქვეყანაში მედიის თავისუფლება დაცულია, მიუხედავად მათი პოლიტიკური ინტერესებისა თუ შეხედულებებისა“, - განაცხადა ირაკლი სესიაშვილმა.

„რუსთავი 2“-ის გენერალურმა დირექტორმა ნიკა გვარამიამ გააკეთა განცხადება, რომ ტელეკომპანიაზე „შეტევის ახალი ფაზა იწყება“.

მისი განცხადებით, „რუსთავი2“-მა ტელევიზიის წილის 9%-ის მფლობელის ნინო ნიჟარაძის სარჩელი მიიღო, რომლის მიხედვითაც, ნიჟარაძე „რუსთავი2“-ის გენერალური დირექტორისგან, სხვა მეწილეებისგან და ე.წ გაყიდვების სახლისგან, ჯამში დაგროვილი გადასახადების სახით, 26 მილიონ ლარის კომპენსაციას ითხოვს.